O alcalde de Navia non descarta novas manifestacións veciñais contra o encoro

La Voz
O alcalde de Navia de Suarna non descarta a celebración de manifestacións veciñais contra a construción do encoro como as de hai décadas, se o proxecto prospera e o municipio segue baixo a ameaza dunha nova presa. José Fernández dixo estar disposto a que o Concello apoie medidas de presión se os veciños, a través da plataforma existente, así o desexan.

O mandatario pide que a Xunta abandone a súa morneza neste asunto e manteña a postura manifestada na anterior lexislatura polo entón presidente. Fernández recordou que Pérez Touriño manifestouse en contra de que se construísen novos encoros en áreas protexidas, anunciando que informarían desfavorablemente o estudo de impacto ambiental. O Goberno central rexeitou o citado estudo, pero posteriormente a empresa Saltos do Navia introduciu unhas modificacións e volveuno a presentar. Nestes momentos está en fase de tramitación, en período de exposición pública, segundo publicou recentemente o Boletín Oficial da Provincia .
A plataforma veciñal naviega presentou alegacións hai varias semanas. Con todo, os cambios na Xunta tradúcense nunha pasividade ou morneza da Administración autonómica fronte a este problema, segundo o alcalde. De todos os xeitos, expresou a súa confianza en que se manifeste en contra.