A corporación municipal de Navia oponse por unanimidade ao encoro de Suarna

O Progreso 18/03/10
O pleno do Concello de Navia aprobou este martes por unanimidade as alegacións que presentará contra o proxecto de construción do encoro de Suarna, que afectaría a este municipio, A Fonsagrada e ao asturiano de San Antolín de Ibias

O Concello remitirá ao ministerio de Medio Ambiente os seus argumentos contra o salto no río coa intención de que o Goberno rexeite o estudo de impacto ambiental que presentou a empresa concesionaria da explotación, Saltos do Navia, co obxectivo de seguir adiante co proxecto e cumprindo os requisitos establecidos por unha sentenza do Tribunal Supremo.

é máis, a corporación municipal considera que chegou o momento de que se retiren á empresa os dereitos de aproveitamento hidráulico-eléctrico na zona, que ten desde 1951 e renovou en 1963.

O Concello de Navia considera que se prexudicaría seriamente o medio natural dunha zona que é Rede Natura e Lugar de Importancia Comunitaria (LIC).

O alcalde, o socialista José Fernández, considera que "xa é hora de acabar cunha ameaza que levamos enciam desde fai case medio século. A posibilidade de que se constrúa o encoro é un lastre para os municipios afectados e incluso repercute no aspecto socioeconómico, ademais de ser un evidente prexuízo desde o punto de vista ecolóxico".

Proxecto
A presa que configuraría o encoro de Suarna alcanzaría os 289 metros de altura e construiríase na Fornaza, no municipio da Fonsagrada. Suporía a inundación dunhas catrocentas hectáreas de Navia, A Fonsagrada e Ibias, sen afectar a ningún núcleo de poblacióm, pero a cola estenderíase ata a vila de Navia.

O proxecto inicial contemplaba o anegamiento da localidade, cuns 1.500 habitantes na actualidade. A forte oposición veciñal fixo que o proxecto fose modificado en 1963. A finais dos anos oitenta volveu exporse a posibilidade do citado encoro pero a idea quedou definitivamente descartada. Recentemente, no 2008, a empresa adxudicataria intentou de novo pór en marcha o proxecto, pero o Ministerio de Medio Ambiente rexeitou o estudo de impacto.